मुंबई : मीरा भाईंदर महापालिका निवडणुकीत स्वबळावर लढणाऱ्या भाजपला शिवसेनेचे मोठे आव्हान आहे. मुख्यमंत्री देवेंद्र फडणवीस हे जातीने लक्ष देत असलेल्या या निवडणुकीची धुरा भाजपने आमदार नरेंद्र मेहता यांच्यावर सोपविली आहे. शिवसेनेने माजी आमदार गिल्बर्ट मेंडोंसा यांच्यासारख्या तगडया नेत्याच्या हातात सूत्रे दिल्याने मेहता यांना विजयासाठी प्रयत्नांची पराकाष्ठा करावी लागणार आहे.
महापालिकेचे मतदान 20 ऑगस्टला होणार असून भाजपने उमेदवारी यादी जाहीर केली आहे. गुजराती, मारवाडी आणि हिंदी भाषिकांची मोठी लोकसंख्या असलेल्या या महानगरात एकूण 95 पैकी 38 जागांवर मराठी उमेदवार दिले आहेत. त्याबरोबरच 57 अमराठी उमेदवारांना उमेदवारी देत सर्व समाज घटकांना पुरेसे प्रतिनिधित्व देण्याचा भाजपने प्रयत्न केला आहे. मुस्लीम समाजाला 5 ठिकाणी आणि ख्रिश्‍चन समाजाला 4 जागांवर उमेदवारी देत सामाजिक समतोल साधण्याचा प्रयत्न केला आहे.
सध्या भाजपच्या गीता जैन महापौर आहेत. 2012 मध्ये शिवसेना आणि भाजप युती म्हणून मीरा भाईंदरची सत्ता मिळवली होती. आता 2017 च्या निवडणुकीत शिवसेना आणि भाजप आमने सामने आहेत. भाजपमध्ये अंतर्गत वादाची स्थिती आहे. नरेंद्र मेहता यांच्या एकाधिकारशाही विरोधात महापौर जैन यांची नाराजी आहे. मेहता यांच्यावर भाजपने निवडणुकीची जबाबदारी सोपवली असलीतरी पक्षातील विरोधकांशी जुळवून घेत सत्ता आणण्याचे मेहता यांच्यापुढे जिकरीचे आव्हान असणार आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.