मुंबई: राज्य मंत्रिमंडळाच्या विस्ताराचा मुहूर्त लांबल्यात जमा आहे. राज्य मंत्रिमंडळात सध्या कोणत्याही प्रकारचे बदल होण्याची शक्‍यता नसल्याचे समजते. मुख्यमंत्री देवेंद्र फडणवीस योग्य तो निर्णय घेतील, अशी नेत्यांना आशा आहे. मात्र निर्णयाचे स्पष्ट संकेत मिळत नसल्याने इच्छुक अस्वस्थ आहेत.
सध्या अनेक कारणांमुळे मंत्रिमंडळ विस्तार होणे कठीण आहे, असे सांगण्यात येते. माजी महसूलमंत्री एकनाथ खडसे गैरव्यवहाराच्या आरोपांमुळे स्वत:हून पायउतार झाले आहेत. त्यांच्या विषयीचा झोटिंग समितीचा अहवाल, तसेच न्यायालयात प्रलंबित असलेले प्रकरण लक्षात घेता खडसे यांच्याबाबत कोणताही निर्णय सध्या शक्‍य नाही. खडसे यांची प्रशासनावरची पकड लक्षात घेता सध्या त्याबाबतीत चाचपडणाऱ्या मंत्रिमंडळाला त्यांची मदत झाली असती; परंतु महत्त्वाकांक्षी स्वभावामुळे ते डोकेदुखी ठरू शकतात, असे सूत्रांचे म्हणणे आहे.
कॉंग्रेस नेते नारायण राणे यांच्या संभाव्य भाजप प्रवेशाबाबत कोणताही निर्णय लगेच होणे अशक्‍य आहे. मुंबईतील गुजराती समाजाचे कथित नेते प्रकाश महेता यांचीही चौकशी होणार आहे. मुख्यमंत्र्यांवर टीका होऊनही मुख्यमंत्री फडणवीस यांनी त्यांना मंत्रिपदावरून दूर केले नाही.
उद्योगमंत्री सुभाष देसाई यांचीही सध्या चौकशी सुरू आहे. त्यामुळे शिवसेना मंत्रिपदासाठी कोणती नावे पुढे करील याबद्दलही कुणाला खात्री देता येत नाही. केंद्रीय मंत्रिमंडळातील खांदेपालटामुळे शिवसेना नाराज आहे. अशा परिस्थितीत नाराजी ओढवून घेण्याऐवजी विस्तार लांबणीवर टाकला जाण्याची शक्‍यता जाणकार व्यक्त करीत आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.