पंकजा मुंडे यांचे राजकीय अस्तित्त्व संपविण्याचे षडयंत्र

भगवान गडावर लोकांचा पैसा आहे. महंत डाॅ. नामदेवशास्त्री यांनी लोकांच्याविरोधात भूमिका घेऊन लोकांचा रोष वाढवून घेऊ नये. अडमुठेपणाची भूमिका घेऊन काहीही साध्य होणार नाही. यावर्षी मेळावा कोणत्याही परिस्थितीत गडावरच होणार आहे. त्यात बदल होणार नाही. गड एकट्या महाराजांचा नाही. तो सर्वांचा आहे. ऊसतोडणी कामगारांनी घाम गाळून त्यासाठी खारीचा वाटा ऊसलत निधी दिला आहे. त्यामुळे गडावर कोणा एकाचे चालणार नाही - माणिक खेडकर
पंकजा मुंडे यांचे राजकीय अस्तित्त्व संपविण्याचे षडयंत्र

मेळावा कोणत्याही परिस्थितीत गडावरच होणार

नगर : 'भगवानगडावर ग्रामविकासमंत्री पंकजा मुंडे यांनी गडावर भाषण करू नये, म्हणूनच महंत डाॅ. नामदेवशास्त्री सानप यांनी राजकीय भाषण होणार नसल्याचे सांगितले आहे. मुंडे यांचे राजकीय अस्तित्त्व संपविण्यासाठी हे षडयंत्र आहे. या मागचा बोलविता धनी कोण, हे शोधून काढणार. या वर्षी मेळावा गडावरच होणार. मुंडे गडावरूनच भाषण करणार,' असा निर्धार पंकजा मुंडे समर्थक कृति समितीने केल्याने गडाचे व्यवस्थापन व जिल्हा प्रशासनासमोर मोठा पेच निर्माण झाला आहे.

गडावर मेळावा होण्यासाठी प्रसंगी काहीही करण्याची तयारी असल्याचे या समितीने जाहीर केले आहे. महंत नामदेवशास्त्री यांनी मात्र गडावर कोणत्याही परिस्थितीत भाषणे होऊ देणार नाही, अशी भूमिका घेतल्याने या वर्षी दसरा मेळाव्याबाबतचा वाद अधिक चिघळण्याची शक्यता आहे. गडाच्या सुरक्षेसाठी पोलिस संरक्षण देण्याची मागणी यापूर्वीच महंतांनी जिल्हाधिकारी अभय महाजन यांना निवेदन देऊन केली आहे. पोलिस अधिक्षक व संबंधित सुरक्षा यंत्रणेने गडावर भेट देऊन पाहणी केली आहे. त्यामुळे पोलिस संरक्षण मोठ्या प्रमाणात असेल, हे स्पष्ट झाले आहे.

गडावर मेळावा होण्यासाठी मुंडे समर्थकांनी एक कृतिसमिती स्थापन केली आहे. त्यामध्ये भारतीय जनता पक्षाचे तालुकाध्यक्ष माणिक खेडकर, माजी आमदार दगडू बडे, पाथर्डी पालिकेचे नगराध्यक्ष डाॅ. मृत्यूंजय गर्जे, अभय आव्हाड, मोहन पालवे, सोमनाथ खेडकर, सुभाष घोडके, नितीन शेलार, संभाजी पालवे आदींसह शेकडो कार्यकर्ते आहेत. गडावर मेळावा होऊ नये, या भूमिकेसाठी महंत ठाम असले, तरी गड कुणा एकट्याचा नाही. वंजारी समाजाबरोबरच बहुजन समाजाचे हे भगवानबाबा श्रद्धास्थान आहेत. गडाला राजवैभव प्राप्त करून देण्यासाठी कै. गोपिनाथ मुंडे यांनी राजवैभव प्राप्त करून दिले. मग त्यांच्या मुलीला गडावर भाषण करण्यास बंदी घालण्याचा उद्देश काय. महंत राजकीय लोकांच्या विशेषतः पंकजा मुंडे यांच्या विरोधात का रान पेटवित आहेत, यामागे षडयंत्र रचले जात आहे. वंजारी समाजासह बहुजन समाजाची एकजुट होऊ नये, हाच यामागचा उद्देश आहे. त्यामुळे या वर्षी मेळावा तर होणारच. तोही गडावरच होईल. त्यामध्ये पंकजा मुंडे भाषण करतील. प्रसंगी काहीही करण्याची कृतिसमितीची तयारी असेल. मेळाव्याच्या तयारीसाठी सर्वांनी एकजूट राखण्याचे आवाहन या कृतिसमितीने केले आहे.

महंतांची भूमिका अडमुठेपणाची- खेडकर
''भगवान गडावर लोकांचा पैसा आहे. महंत डाॅ. नामदेवशास्त्री यांनी लोकांच्याविरोधात भूमिका घेऊन लोकांचा रोष वाढवून घेऊ नये. अडमुठेपणाची भूमिका घेऊन काहीही साध्य होणार नाही. यावर्षी मेळावा कोणत्याही परिस्थितीत गडावरच होणार आहे. त्यात बदल होणार नाही. गड एकट्या महाराजांचा नाही. तो सर्वांचा आहे. ऊसतोडणी कामगारांनी घाम गाळून त्यासाठी खारीचा वाटा ऊसलत निधी दिला आहे. त्यामुळे गडावर कोणा एकाचे चालणार नाही. गडावर मेळावा होण्यासाठी लोकांची काहीही करण्याची तयारी आहे,'' असा इशारा भाजपचे तालुकाध्यक्ष माणिक खेडकर यांनी 'सरकारनामा'शी बोलताना दिला.

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com