नगरच्या पालकमंत्र्यांनी काढला 'सातबारा'

नगर : जमिनीचा सातबारा व आठ-अ, फेरफार आदी महत्त्वाचे कागदपत्रे आता एका क्लिकवर मिळणार आहेत. त्यासाठी असणारी कीऑस्क प्रणाली नगरमध्ये सुरू करण्यात आली.

पालकमंत्री राम शिंदे यांच्या हस्ते या प्रणालीचे उदघाटन काल झाले. या वेळी त्यांनी स्वतःच्या जमिनीचा सातबारा या प्रणालीद्वारे काढला. तर आमदार बाळासाहेब मुरकुटे यांनी त्यांच्या जमिनीचे फेरफार काढले. 

जिल्हाधिकारी राहुल द्विवेदी यांनी या प्रणालीची सविस्तर माहिती दिली. केवळ एका क्लिकवर कोणत्याही नागरिकांना त्यांना हवी असणारी कागदपत्रे मिळणार आहेत. जिल्हाधिकारी राहुल द्विवेदी यांच्या संकल्पनेतून ही सुविधा सुरू करण्यात आली आहे. जमिनीचा सातबारा, आठ अ खाते उतारा, जन्म-मृत्यू नोंदी, इनामपत्रक आदी दस्ताएवज याद्वारे मिळणार आहे. १९३० पासून ते २०१३ पर्य़ंतची तब्बल पावणेदोन कोटी कागदपत्रांचे (जुने अभिलेख) स्कॅनिंग त्यासाठी करण्यात आले असून, तो डाटा या प्रणलीत साठविण्यात आला आहे. यात जुने गटनंबर आणि जुने सर्वे नंबर उपलब्ध आहेत.