नगर : आपल्या उमेदवारीसाठी लोकांनी उठविलेल्या वावड्या आहेत. मला पक्षाने जिल्हाध्यक्षपद देवून भरभरून दिले आहे. मी कोणतीही उमेदवारी करणार नाही, असे एका कार्यक्रमात जाहीर करून राष्ट्रवादी काॅंग्रेसचे जिल्हाध्यक्ष राजेंद्र फाळके यांनी कर्जत-जामखेड मतदार संघात विधानसभेसाठी कोणाला वाट मोकळी करून दिली, याबाबत तर्क-वितर्क लावले जात आहेत.
फाळके यांची नुकतीच जिल्हाध्यक्षपदी निवड झाली. खरं तर ही निवड म्हणजेच पक्षाकडून विधानसभेचा त्यांचा पत्ता कट केला, असा अर्थ काढला जात होता. त्यानंतरही ते विधानसभेसाठी उमेदवारी करतील, अशी चर्चा सुरू झाली. मात्र कर्जतमध्ये एका मेळाव्यात त्यांनी या विषयाला तोंड फोडले. मला जिल्हाध्यक्ष करून पक्षाने भरभरून दिले. मी त्यात समाधानी आहे. सध्या तरी कोणतीही निवडणूक लढविणार नाही, असे सांगून त्यांनी स्वतः विधानसभेसाठी उमेदवारी करणार नसल्याचे सांगून टाकले. त्यामुळे राष्ट्रवादी-काॅग्रेसच्या आघाडीत फाळके यांचा पत्ता कट झाल्याने इच्छुकांच्या आशा पल्लवीत झाल्या आहेत.
आघाडीकडून उमेदवारी करणाऱ्या उमेदवाराला भारतीय जनता पक्षाच्या प्रा. राम शिंदे यांच्याशी टक्कर द्यावी लागणार आहे. शिंदे यांच्या ताब्यात मतदार संघातील बहुतेक महत्त्वाच्या सत्ता आहेत. जामखेड नगरपालिकेवर शिंदे यांचेच वर्चस्व आहे. कर्जतमध्येही त्यांचा चांगलाच बोलबाला आहे. या पार्श्वभूमीवर शिंदे यांना तोंड देणारा उमेदवार कोण असेल, याबाबत आता उत्सुकता आहे. फाळके यांच्याकडे जोपर्यंत राष्ट्रवादीचे जिल्हाध्यक्षपद नव्हते, तोपर्यंत फाळके उमेदवार होऊ शकतील, असे सांगितले जात होते. मात्र आता जिल्हाध्यक्षपद आल्याने ते उमेदवारी करणार नसल्याचे त्यांनी जाहीर केले आहे, त्यामुळे प्रा. शिंदे यांना सक्षमपणे कोण तोंड देणार, हे काळच ठरविणार आहे.
फाळके यांच्या भूमिकेमुळे महिला राष्ट्रवादी काॅंग्रेसच्या जिल्हाध्यक्षा मंजुषा गुंड यांचा उमेदवारीचा मार्ग आता अधिक सुकर झाला आहे. कर्जतमधील त्याच मेळाव्यात गुंड यांचे पती पंचायत समितीचे सदस्य राजेंद्र गुंड यांनी आपली भूमिका मांडली. पक्षाने लवकर उमेदवारी निश्चित करावी. भाजपच्या प्रा. राम शिंदे यांचा समाचार घेण्यासाठी प्रसंगी आपण जमिनी विकू पण त्यांचा पराभव करू, असे सांगून गुंड कुटुंबिय उमेदवारीच्या तयारीत असल्याचे त्यांनी सूचित केले.
दरम्यान, आघाडीकडून उमेदवारीसाठी काॅंग्रेसचे नेतेही तयारीला लागले आहेत. काॅंग्रेसच्या जिल्हा सहकारी बॅंकेच्या संचालिका मिनाक्षी साळुंके, तालुकाध्यक्ष प्रा. किरण पाटील यांनीही तयारी केली आहे. त्यामुळे फाळके यांच्या भूमिकेने अनेकांचे मार्ग सुकर झाले आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.