Haribhau Bagde Teases MP Chandrakant Khaire | Sarkarnama

खैरे अजूनही नगरसेवकाच्या भूमिकेत  : हरिभाऊ बागडे यांनी आदित्य ठाकरेंसमोरच काढला खासदारांना चिमटा 

मधुकर कांबळे 
रविवार, 23 डिसेंबर 2018

अर्धवट माहितीच्या आधारे आमचा नगरसेवकही बोलत नाही, मात्र चंद्रकांत खैरे खासदार असताना काहीही आरोप करतात. खैरे जरा खासदारासारखे वागा असा चिमटा विधानसभा अध्यक्ष हरिभाऊ बागडे यांनी रविवारी (ता.23) शहर बसच्या उद्घाटनप्रसंगी काढला. विशेष म्हणजे यावेळी युवासेनाप्रमुख आदित्य ठाकरे यांची व्यासपीठावर उपस्थिती होती. 

औरंगाबाद : अर्धवट माहितीच्या आधारे आमचा नगरसेवकही बोलत नाही, मात्र चंद्रकांत खैरे खासदार असताना काहीही आरोप करतात. खैरे जरा खासदारासारखे वागा असा चिमटा विधानसभा अध्यक्ष हरिभाऊ बागडे यांनी रविवारी (ता.23) शहर बसच्या उद्घाटनप्रसंगी काढला. विशेष म्हणजे यावेळी युवासेनाप्रमुख आदित्य ठाकरे यांची व्यासपीठावर उपस्थिती होती. 

स्मार्ट सिटी योजनेअंतर्गत रविवारी ठाकरे यांच्या हस्ते शहर बस सेवेचा प्रारंभ करण्यात आला. यावेळी शिवसेना-भाजप युतीच्या नेत्यांमध्ये कलगीतुरा रंगला. दोन दिवसापूर्वी खासदार खैरे यांनी हरिभाऊ बागडे यांच्यावर कषी उत्पन्न बाजार समितीमध्ये भ्रष्टाचार केल्याचा आरोप केला होता. त्याचा वचपा बागडे यांनी ठाकरे यांच्या समोर काढला. 

ते म्हणाले, ''खासदार अजूनही नगरसेवकाच्याच भुमिकेत आहेत, त्यांनी त्यातुन बाहेर यावे. अर्धवट माहिती आधारे आमचा नवीन नगरसेवकही बोलत नाही. महापालिकेला राज्य आणि केंद्र सरकारने मिळून अडीचशे ते पावणे तीनशे कोटी रुपये दिले. परंतू, ते अद्यापही खर्च करण्यात आले  नाहीत. शहराचा विकास आराखडा तयार नाही." आदित्यजी या  शहराकडे तुम्ही लक्ष द्या, असे सांगत बागडे यांनी शिवसेना नेत्यांना फैलावर घेतले. 

कै. शिवसेनाप्रमुख बाळासाहेब ठाकरे यांच्या स्मारकाची निविदा महापालिकेला का काढता आली नाही असा सवालही त्यांनी केला. शहर बस, भूमिगत गटार  योजनेचा मी यजमान आहे. योजनेत कुणाचे श्रेय नाही. ते फक्त माझेच आहे, महापालिकेचेही नाही, असा दावा खासदार खैरे यांनी केला. खैरे यांच्या प्रयत्नांमुळे या योजना आल्या नाहीत तर यात भाजपचे प्रदेशाध्यक्ष रावसाहेब दानवे, विधानसभा अध्यक्ष हरिभाऊ बागडे यांचाही तेवढाच मोठा वाटा आहे, असे भाजपचे आमदार अतुल सावे यांनी सांगितले.

खासदार खैरे माध्यम प्रतिनिधींवर उखडले
आदित्यठाकरे व्यासपीठावर आले असता, आता  बाईटसाठी आमच्या पाठीमागे धावत आहात. आता मी देणार नाही, असे खैरे म्हणाले. माजी खासदार प्रदीप जैस्वाल, जिल्हाप्रमुख अंबादास दानवे, ऋषिकेश जैस्वाल, किरण तुपे यांनी मध्यस्थी केल्यानंतर प्रकरण निवळले

संबंधित लेख