गौरी लंकेश यांची भररस्त्यात हत्या होते हे कशाचे लक्षण ? उद्धव ठाकरेंचा सवाल 

मुंबई : पत्रकार गौरी लंकेश यांच्या हत्येचा फक्त निषेध आणि धिक्कार करून चालणार नाही. जे लोक आपल्या विचाराचे नाहीत व आपल्या भूमिकेचे समर्थन करीत नाहीत अशा लोकांचा आवाज कायमचा बंद करणारी एखादी यंत्रणा पोलादी भिंतीमागे अदृश्‍यपणे काम करीत आहे काय ? असा सवाल शिवसेना पक्षप्रमुख उद्धव ठाकरे यांनी उपस्थित केला आहे. 

"गौरी लंकेशची हत्या" या मथळ्याखाली सामनाने लेख प्रसिद्ध करून या हत्येचा निषेध केला आहे. 

उद्धव ठाकरे लिहतात, " एका निःशस्त्र महिला पत्रकाराची हत्या बंगळुरूच्या भररस्त्यावर झाली आहे. लंकेश या महिला पत्रकारावर काही अज्ञात तरुणांनी गोळ्या झाडल्या व ते पसार झाले. एक निःशस्त्र महिला रक्ताच्या थारोळ्यात निपचित पडली. तिचे विचार व भूमिका कदाचित कुणाला पटत नसतील. तिच्या लिखाणाने व भूमिकेने कुणी अस्वस्थ झाले असतील, म्हणून त्या निःशस्त्र महिलेवर अशाप्रकारे निर्घृण हल्ला करणे हे अमानुष आहे. मानवता व देशाच्या इभ्रतीस कलंक लावणारे आहे. हे शौर्य नाही व मर्दानगीचा जयही नाही. हिंदुस्थानच्या संरक्षणमंत्री पदावर एका महिलेची नियुक्ती झाली म्हणून एका बाजूला आनंदाने टाळ्या वाजवीत असतानाच त्याच हिंदुस्थानच्या भररस्त्यावर एका महिला पत्रकाराची हत्या व्हावी हे कसले लक्षण समजायचे ? 

" गोरक्षकांच्या उन्मादावर स्वतः पंतप्रधान मोदी यांनी चिंता व्यक्त केली आहे. या देशात कोणी काय खायचे यावरून वादंग आणि हिंसा सुरू आहे व त्यात अनेकजण नाहक प्राणास मुकले आहेत. शिवसेनेचा पराभव करा व भाजपला विजयी करा, असे जाहीर सभांतून सांगणारे तथाकथित जैन मुनी एकप्रकारे हिंसेचेच समर्थन करतात व राज्यकर्त्या पक्षांचे लोक त्यांच्या चरणावर डोके ठेवतात. मांसाहार करणाऱ्यांना मुंबईत घर नाकारायचे व त्यांची आर्थिक कोंडी करायची. हे कोणत्या शांती व अहिंसेत बसते ? असा सवालही ठाकरे यांनी केला आहे.