शिवसेना गटनेते राहूल कलाटेंची डेप्युटी इंजिनिअरला मारहाण

पिंपरी: पिंपरी चिंचवड महापालिकेतील शिवसेनेचे गटनेते राहूल कलाटे (वय ३५, रा.वाकड) यांनी पालिकेच्या डेप्युटी इंजिनिअरला पालिकेतच मारहाण केली. सोमवारी ही घटना घडली. मात्र, या प्रकाराने घाबरुन गेल्याने या इंजिनिअरने आज तक्रार दिली.  

सरकारी कामात अडथळा आणल्याचा गुन्हा कलाटेंविरुध्द नोंद केल्याचे पोलिसांनी सांगितले. त्याबाबत पालिकेच्या बांधकाम विभागातील उपअभियंते अनिल महादेव राऊत (वय ५२, रा. आकुर्डी रेल्वे स्टेशनजवळ, चिंचवड) यांनी पिंपरी पोलिस ठाण्यात फिर्याद दिली आहे. पालिकेतील कार्यकारी अभियंता सतीश इंगळे यांच्या केबिनमध्ये हा प्रकार घडला आहे. कलाटे यांच्या टीडीआर हस्तांतरण फाईलवर पालिका आयुक्तांची सही न घेतल्यातून हा प्रकार झाल्याचे समजले. त्यात विनोद मोरे (वय २८, रा. पिंपरी) या आर्किटेक्टरकडे  काम करणाऱ्यालाही आरोपी करण्यात आले आहे. कलाटे यांनी खुर्ची फेकून मारली. तसेच गचांडी पकडून मारहाण केली, असे तक्रारीत म्हटले आहे. 

दरम्यान, ''आगामी निवडणुकीत  मला आणि माझ्या पक्षाला बदनाम करण्यासाठी भाजपने रचलेले हे षडयंत्र आहे.''असे कलाटे यांनी  सांगितले.