बंगळूर : राज्यातील तीन महापालिकांसह 105 शहर स्थानिक स्वराज संस्थांच्या निवडणुकीची मतमोजणी सोमवारी पूर्ण झाली. राज्यातील पालिकांत सत्ता स्थापन करण्यात कॉंग्रेस व भाजपात अटीतटीची लढत झाल्याचे निकालावरून स्पष्ट झाले. एकूण सदस्यांपैकी सर्वाधिक 982 जागा जिंकून कॉंग्रेसने वरचष्मा कायम ठेवला.
कॉंग्रेसला 33 पालिकांमध्ये स्पष्ट बहुमत मिळविता आले. भाजपला 32 तर धर्मनिरपेक्ष जनता दलला (धजद) केवळ 12 पालिकांमध्ये स्पष्ट बहुमत मिळाले. 28 ठिकाणी त्रिशंकू अवस्था निर्माण झाली आहे. राज्यातील 3 महापालिका, 29 नगरपालिका, 53 नगर परिषदा व 20 नगर पंचायतीसाठी 31 मार्चला मतदान झाले होते. एकूण 2264 प्रभागांपैकी 2661 प्रभागांत निवडणूक घेण्यात आली. त्यापैकी 982 जागांवर कॉंग्रेस, 929 जागांवर भाजप व 375 जागांवर धजदचे उमेदवार विजयी झाले. 375 जागांवर अपक्षांनी विजय मिळविला.
29 नगरपालिकांपैकी भाजपचे सर्वाधिक दहा, कॉंग्रेसने 7 तर धजदने 2 ठिकाणी विजय मिळविला. दहा नगरपालिकांमध्ये त्रिशंकू अवस्था आहे. राज्यातील 53 नगर परिषदांपैकी 19 ठिकाणी कॉंग्रेस, 14 ठिकाणी भाजप आणि 8 ठिकाणी धजदला बहुमत आहे. अन्य 12 नगरपरिषदांमध्ये कोणत्याच पक्षाला बहुमत नाही. 20 नगरपंचायतींपैकी कॉंग्रेस आणि भाजपने प्रत्येकी 7 ठिकाणी तर धजदला केवळ दोन ठिकाणी बहुमत मिळवता आले.
4 नगरपंचायती त्रिशंकू अवस्थेत आहेत.
राज्यातील तुमकूर महापालिकेत कॉंग्रेस आणि धजद आघाडी सत्तेवर येण्याची चिन्हे आहेत. तर शिमोगा महापालिकेत भाजपने स्पष्ट बहुमत मिळविले आहे. म्हैसूर महापालिकेतही कोणत्याही पक्षाला बहुमत नाही. मात्र, या ठिकाणीही कॉंग्रेस-धजद आघाडी सत्ता मिळवण्याची स्थिती आहे.
निकालाची स्थिती (एकूण सदस्यसंख्या 2661)
कॉंग्रेस : 982
भाजप : 929
धजद : 375
अपक्ष : 375
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.